الطب وسنينه - الوصايا العشر للنجاح في كلية الطب

مقتبسات من كتاب الجهلاء
لإبن الناظر الفوزي

1 ) لا تفكر :
التفكير خطيئة.. هذا هو ماتربينا عليه منذ الصغر..وهذا من عاداتنا وتقاليدنا العظيمة التي يجب أن نحافظ عليها..فيجب أن تتعلم أن لا تفكر..وحاول أن تجاهد نفسك الأمارة بالسوء..
أقصد الأمارة بالتفكير..

2 ) لا تسأل :
لا تسأل أي أحد عن أي شيء.. فلن يتطوع أحد لإجابتك.. بل وربما يخبرك بمعلومات مغلوطة..
اتبع غريزتك..اعتمد على نفسك..لتقوي في نفسك الإحساس بالمسؤولية..

3 ) لا تجادل :
وخذ ما يقال لك كأنه حقائق مسلم بها ، ولو قالوا لك بأن الشمس تشرق من المفرب..ولو قالوا ان الشمس لا تشرق أصلا..!
فلن تأت أنت – يا طالب – لتغير موازين الكون.. عفوا.. موازين الكلية..
ولسوف تسمع عبارة الطالب غير قادر على تقييم أستاذه..أبدا
طب اشمعنى ..؟! أهو.. غلاسة كده.. اعترض بقى..!
عامة ستسمعها قريبا.. وعندها..سوف تصدقني ..!ّ!

4 ) لا تصدق :
لاتصدق أي تصريحات تخرج من مبنى إدارة الكلية..ولا أي كلام يقال عن ارتفاع الدرجات آخر السنة.. أو ارتفاع مستوى الطلبة - أهم دول الحاجة الوحيدة اللي بتترفع في الموضوع ده !- بعد شهادة الأيزو..
وصدق الشائعات.. فهي تصبح دوما حقائق..

5 ) لا تحضر محاضرات :
لاتحضر محاضرات في الكلية أبدا..( طبعا باستثناء محاضرة رئيس القسم اللي بيحدد فيها الإمتحان )..المحاضرات رجس من عمل الشيطان.. الداخل فيها مفقود.. والخارج منها.. مفقود برضه !!

6) لا تذاكر :
من كتاب القسم..وفر منه فرارك من الكلب المسعور.. واعلم أنه من كان يملك كتاب القسم ، فقد باء بسخط الأساتذة أنفسهم.. ( مع أنهم هم اللي ألفوه !! ) .. ولو ذاكرت ، لا تقل لأحد أبدا..وإذا سألك أحد ، لا تذكر الحقيقة.. اتغابى..!
ابحث دوما عن ورق الدروس.. ابحث ولو في الصين.. واحفظ مذكرة الإمتحانات.. فهي دستورك في هذه الكلية..


7 ) ابحث عن الواسطة :
فهي مفتاح كل شيء في هذه الكلية..درجات مرتفعة مش تعرف جاية منين..الدكتور يدلعك.. تدخل لمكتب العميد.. تخرج من عنده سليم..المتحف يتفتح ليك مخصوص..تستلم علبتين شرائح مجانا.. تاخد جثة معاك البيت.. امتحانك الشفوي يكون في الأول بدل ما تترمي في آخر الدفعة..
وياريت تفتكر المثل اللي بيقول.. يابخت من كان رئيس القسم خاله..أو عمه..أو أبوه..أو أمه..إلخ..إلخ..

8 ) ابحث عن الدرس :
أينما وجد الدرس، وجد التفوق.. هذه مقولة عظيمة للمعلم الأعظم مش عارف مين كده.. وقالها في درس خصوصي بالمناسبة..
المهم .. ابحث جيدا.. وتذكر أيام الثانوية العامة بحسرة.. لأنك هاتبيع اللي وراك واللي قدامك علشان درس واحد بس..

9 ) كن وغدا :
أهم نصيحة في الليلة دي.. كن وغدا ..مع زملائك..مع أصدقائك..مع الجو بتاعك..مع الدكاترة.. مع أي حد تقابله..ومع العمال بالذات..لكن بحذر..فهم القوة النافذة في القسم ، بعد الرئيس مباشرة.. وارجع للنصيحة رقم سبعة.. وافتكر معايا.. يابخت من كان العامل..خاله.. أو عمه.. أو أبوه.. إلخ.. إلخ..

10 ) النصيحة العاشرة :
كن متأكدا دوما..أنك كنت لاشيء قبل الكلية.. وأنك ستصبح بعد التخرج – بعد عمر طوييييييل – لاشيء برضه..
إن الحياة ليست وردية كما يقولون.. بل هي أكثر سوادا من شعرك.. لا مؤاخذة لو كنت أقرع يعني ..
كن دوما مؤمنا بالمقولة الشهيرة.. إذاعجزت عن الحياة في كلية الطب.. فاذهب إلى كلية الآداب.. أو اذهب للجحيم..!!

10` ) النصيحة العاشرة بشرطة :
سيبك من الكلام الفارغ اللي فات ده كله.. وخد المفيد.. انت تشوف ليك أي بنت دكتور كبير أو رئيس قسم .. وتبدأ تظبط نفسك عليها.. وياريت بقى لو بنت العميد.. تبقى الحاجة داعيالك..
لكن خد بالك من العلامة دي.. لازم تكون عارف هو باقي ليه قد إيه .. آه.. ماهو مش موت وخراب ديار ياصاحبي..!!
أما بقى لو ربنا أخده عنده .. دي فيها كلام.. لو في نص السكة..يبقى مالهاش حل تاني.. عليك وعلى العميد الجديد..بس بقى لو الليلة خلصت خلاص.. يبقى انت بقى نحس.. ومش عندك غير الصبر لحد الفرج.. وأرجوك اوعى تنتحر.. لأنك في الغالب هاتروح النار، في أسفل سافلين.. وهناك هاتقابل حماك .. وتبقوا جيران بقى ...!!!!!

أنا قلت كلامي.. وكل واحد بقى وضميره..
سلام..